مرحبا بكم أعزائى زوّار مدونة لقمة عيش ، ونلفت الانتباه إلى أن جميع المقالات المنشورة خاصة بصاحب ومحرر المدونة مالم يشار إلى إسم أو مصدر آخر - مع خالص تحيات المحرر: أبوالمعالى فائق

السبت، 17 يوليو 2010

10 حوار مدونة "لقمة عيش" مع الرئيس حسنى مبارك

دق جرس التليفون وكالعادة لم يرد أحد من الأسرة،لكن الهاتف لم يصمت رنينه فقالت لى زوجتى رد لعله مواطن يستغيث أو يريد شيئا 
ملحا فأمسكت سماعة الهاتف :

السلام عليكم من معى ؟.

مساء الخير: منزل أبوالمعالى بيه.

مساء النور: نعم منزل أبوالمعالى من غير بيه.

أهلا سعادة الباشا: أنا من مكتب السيد فخامة رئيس الجمهورية.

أبوالمعالى: لا أنا لا أريد أن أكون نائبا للسيد الرئيس.

المتصل: أنا لا أمزح معك مكتب السيد الرئيس .

أبوالمعالى: يا "إكسلانس" أنا "مش" فاضى رايح أجيب عيش وفول للفطار.

المتصل: يا أستاذ إنت ليه مش مصدق إنى باكلمك من مكتب السيد الرئيس.

أبوالمعالى:أى رئيس .. رئيس الوحدة المحلية ؟ .

المتصل: ورحمة أمى باكلمك من مكتب السيد رئيس جمهورية مصر العربية محمد حسنى مبارك.

أبوالمعالى: أكيد حضرتك من برنامج الكاميرا الخفية .

المتصل: وبعدين معاك؟ مش ممكن!،إنت مطلوب لمقابلة سيادة الريس بعد 72 ساعة من الآن ولا تذهب إلى أى مكان .

أبوالمعالى: وسعادتك مش عارف عاوزنى ليه أنا ضد البرادعى والأشعل وأنا حزب معارض وحزب مغضوب عليه.

المتصل: أنا دورى فقط أبلغك بالموعد.

أبوالمعالى: دخل "w .c"  وأحضر كتابا يتحدث عن مواطن صعلوك يقابل حاكم ،جلست فى الحمام أضع الاحتمالات. وضعت أول احتمال إنها سياسة جديدة لرئيس الدولة يعمل قرعة على أرقام التلفونات ويتصل بها عشوائى ،وممكن رقم هاتفى يكون هو الفائز،والاحتمال الآخر أنا الحقيقة هاجمت الرئيس مبارك كثيرا فقلت ربما يسألنى لماذا تهاجمنى فى كل كلماتك فى أى ندوة أو مؤتمر ،والاحتمال الأخير يسألنى عن آخر تطورات حزب العمل ولا أخفيكم سرا أن النوم قد فارق عيونى .


فى اليوم التالى


رن جرس المحمول ولم أشاهد على شاشته أى أرقام واستبدلت برقم غير معروف.

أبوالمعالى: السلام عليكم

المتصل: أهلا يا أستاذ أبوالمعالى "مش" حضرتك الأستاذ أبوالمعالى.

أبوالمعالى: نعم أنا هو بلحمه وشحمه فمن أنت يا إكسلانس؟.

المتصل: هههههه حلوة "إكسلانس" جبتها منين كنت فاكرك محبكها حبتين قالوا لى انك دايما مكشر.

أبوالمعالى: سعادتك لم تخبرنى من أنت ؟وماذا تريد؟

المتصل: أنا من جهاز الأمن العام مكلف بأن أخبرك أنه فى تمام الساعة 7 ص تكون مستعد لنذهب سويا إلى سفر قد يطول بعض الوقت.

أبوالمعالى: أنتم غيرتم طريقة الاعتقال وأصبح عن طريق التليفون ،شئ جميل خالص..جميل آخر حاجة..حاجة "بيوتفل" خالص.

المتصل: اعتقال إيه يا سعادة الباشا هو فيه اعتقال بالتليفون والله سعادتك مرح جدا،يا أستاذ واضح إن فيه مقابلة مهمة لك.

أبوالمعالى: اتصلت بالحلاق نبهت عليه "يحلقلى" حلقة ميرى لأن الأمور ليست على ما يرام  لحد اللحظة.

فى الموعد المحدد

جاءت سيارة لم أشاهدها إلا فى أفلام أجنبية رايتها بعد اتصال هاتفى بأن أكون أمام باب المنزل بعد دقائق .

شخص مدنى: سعادتك أبوالمعالى باشا .

أبوالمعالى : نعم يا لورد أنا أبوالمعالى تفضل .

نفس الشخص : لا وقت لدينا تفضل اركب فى المقعد الخلفى.

الشارع :

تجمع أهالى الشارع وأسرتى وسارت شائعة بأنى قد ألقى القبض على حيث أنهم ابلغونى بالسرية التامة.

فى الطريق

     لم نتحدث فى أى شئ ولم أسأل فأنا بطبعى لا أحب التطفل .لا سيما وأن السيارة لا تكشف من بالخارج .

بعد عدة ساعات قال لى مرافقى بقى على وصولنا أقل من 5 دقائق،وبالفعل وصلنا إلى مكان لم أره من قبل فى مصر حيث أعيش فى قرية كل يوم نعمل فيها مشكلة على العيش. نزلنا من السيارة وعرفت أنه كانت ترافقنا سيارات أخرى وقبل أى شئ نظرت إلى هندامى فى مرأة السيارة فوجدت نفسى مرتبك بعض الشئ أدخلونى فى مكان يبدو عليه الفخامة الزائدة فجلست على أحد الكراسى وقلت فى نفسى أنا كمواطن ممكن يكون لى سهم فى هذا الكرسى وعيناى على سقف المكان الذى أجلس فيه خوفا من أن تكون كاميرا مزروعة فى أحد الأماكن تسجل فيه حركاتى وسكناتى حاولت أن أكون غير مهتم بأى شئ.وإثناء تفكيرى خرج شخص وسيم يرتدى زيا مدنيا وبابتسامة جميلة قال: تفضل يا إكسلانس فضحكنا سويا وعرفت أنه أول متصل .

     دخلت فى مكتب تمت كل شئ فيه بعناية فائقة فعرفت أننى وصلت إلى آخر مكان.وبعد فترة لا تصل إلى 7 دقائق رأيت السيد الرئيس أمامى فحاولت أن أتظاهر وكأنى أنا وهو نفطر فول وطعمية صباح كل يوم .

وهنا دار الحوار



الرئيس مبارك: صباح الخير .. إيه الناس بتوعنا تعبوك ولا إيه،بيقولوا عليك إنك مشاغب..بس مش باين عليك.


أبوالمعالى: صباح الخير حمدا لله على سلامتك نورت مصر يا ريس..البلد من غيرك ولا حاجة..كنا عاملين زى اليتامى يا ريس،وانا غلبان ولا مشاغب ولا حاجة احنا بس بنجرب الديمقراطية.

الرئيس مبارك: حيلك حيلك..متخفش مش هنتكلم فى أى حاجة.الزمن اتغير .

أبوالمعالى : ممكن سؤال قبل الدخول فى أى مواضيع يا فخامة الرئيس؟ .

السيد الرئيس : طبعا بكل تأكيد أنت هنا اليوم لتسأل وأنا أجيب وليس لدى أى خطوط حمراء،وعلى فكرة أنا بأتابع " مدونة لقمة عيش" عجبنى جدا اسمها حتى كل ما أشوف أى حد أنصحه أن يتابعها.

أبوالمعالى فى سره : يا خوفى يا بدران ياترى القدر مخبيلى إيه يعنى الريس هيشوف مدونتى..ممكن وليه لأ دى أحسن من الوطنى اليوم بتاعت الحزب الوطنى طبعا من وجهة نظرى.
السيد الرئيس: كنت عاوز تسأل ..إيه السؤال ؟


أبوالمعالى: أنا فعلا أمام السيد الرئيس محمد حسنى مبارك؟ ثم أشكر فخامتكم أنك تتابع "لقمة عيش"

السيد الرئيس: إيه هل لديك شك فى أن الواقف أمامك هو حسنى مبارك؟

أبوالمعالى: فخامتك عارف إشاعات المصريين وحكاية الشبيه والكلام الفارغ اللى بيطلع من بعض الناس.

الرئيس: ههههههههه ظريفة حكاية الشبيه طبعا ده كلام مش ممك يكون وقبل "كده" وللآن الناس فاكرة إن صدام حسين لم يعدم واللى اتعدم هو شبيهه.


أبوالمعالى: كلام سيادتك صح ياريس هو فيه صحفى كان وراء هذه الشائعة وكان بيقول أكثر من هذا بس إن الله على عبيده ستار برضه وراه عيال.


الرئيس: حتى لو عرفته ..خلاص انتهى عصر الفوضى احنا اليوم بنفتح صفحة جديدة ،وعفا الله عما سلف.

أبوالمعالى: أنا خايف أعتذر لفخامتك تتصور إنى بأنافقك مثل رؤساء تحرير الصحف القومية.


الرئيس: اعتذار إيه يا راجل مفيش بين المصريين اعتذار لا فرق بين الرئيس والمرؤوس


الرئيس: إيه يا "أبوالمعالى" إن شاء الله نتغدى مع بعض اليوم وندردش على مائدة الطعام.

أبوالمعالى: أنا فى حلم ولا فى علم يا ترى غدا إيه اللى يقصده الريس "حديث مع النفس"

أبوالمعالى: يا فندم يكفى الجلوس مع فخافمتكم هذا أفضل من الغدا وبعدين فيه كام سؤال عاوز أطرحهم على فخامتكم .

الرئيس: معنديش مانع وبالمناسبة نوضح للرأى العام منهجنا فى المرحلة القادمة .

أبوالمعالى: هو حضرتك "لسة" فيه مرحلة قادمة "كده" أنا مضطر أنهى الحوار يا سعادة الريس.

الرئيس : خير ليه أنا "زعلتك" فى حاجة

أبوالمعالى : يا فندم دى أول القصيدة كفر هو حضرتك عاوز تستمر فى الحكم بعد السنين الطويلة دى.

الرئيس: وإيه المشكلة الشباب شباب الفكر والقلب سيبك من تهور الشباب بتوع المعارضة أنا مقدر حماسهم وبيفكرونى بشبابى بس مكنتش متهور ومندفع بالطريقة اللى بيطلعوا بيها .

الرئيس: هل يعقل يخرج ناس ويهتفوا والإعلام يصور "يسقط يسقط حسنى مبارك" وكلام كتير حصل وأنا ساكت واديت تعليمات محدش يعترض عليهم لأننى وعدت بالحرية .

أبوالمعالى: سيادتك احنا بدأنا الحوار من آخره وبكده كأنك بتقوللى لم ورقك وبالسلامة وكفاية عليك كدة.

الرئيس: لا والله أنا مخصص اليوم ده "للمدونات" ولك الحق فى أى سؤال تطرحه اليوم يوم الحرية المطلقة.

أبوالمعالى: هذا كرم من سعادتك،لكن لدى بعض الأسئلة ممكن تضايق حضرتك منها أسئلة متعلقة بمدة الحكم،وبعضها متعلق بنجل فخامتكم والتمديد والتوريث.

الرئيس: شوف يااااا اسمك تقيل إنت مين اللى سماك الاسم ده ماله محمد واحمد ومصطفى ووائل وتامر ورامى وحتى جمال وعلاء.

أبوالمعالى: نتفق على اسم أنا عندى ثلاثة أولاد أحدهم اسمه حماس ممكن سيادتك تقوللى يا أبا حماس.

الرئيس: إنت فيه حد مسلطك عليه "لا" خلينا فى اسمك أحسن حماس هو حد جاب لى المرارة إلا حماس..لو ذكرت أمامى الاسم ده تانى  يبقى اعتبر اللقاء انتهى.

أبوالمعالى: لكن سعادتك هذا الاسم ممكن يأتى فى سياق سؤال.

الرئيس: ولا سؤال ولا جواب خلينا فى مصر أفضل .

أبوالمعالى: وهو كذلك مصر هى الأهم ..إن صلحت صلح العرب جميعا وإن كانت غير ذلك فلله الأمر من قبل ومن بعد.

السيد الرئيس: انت ليه مصر على الحديث بالفصحى متحبكهاش كده خلى البساط أحمدى ونتكلم بالبلدى علشان الناس تفهم احنا "بنئول إيه" .


أبوالمعالى: وماله ميضرش وبصراحة انت شجعتنى وفتحت قلبى لك بعد ما كان يعنى شوية كدة من ناحيتك،ندخل فى الموضوع والأسئلة وفخامتك شجعتنى برحابة صدرك ده لو حضرتك قابلت كل الناس كده هيبايعوك مدى الحياة دى الناس مش عارفة حاجة خالص دى المعارضة دى المفروض نلغيها بلا معارضة بلا كلام فارغ ده انا معرفش اقعد مع أصغر رئيس حزب كل الوقت ده.


السيد الريس: شوف يا "أبوالمعاطى"


أبوالمعالى مقاطعا: أبوالمعالى يا فندم مش ابوالمعاطى

السيد الرئيس: يا ابوالمعالى مدئش على كل كلمة هتفرق ماشى يا ابوالمعالى المهم لازم تعرف ان الناس بره اللى همه الشعب انا مقدر ظروفهم وعارف إنهم مش فاهمين الوضع زى ما أنا فاهمه وزمان كان التلفزيون مظبط الناس شوية "دلوئت" كل واحد عاملله قناة وكل قناة بتقول كلام عكس التانى والشعب  بقى ملطشة للقنوات،و أنا متابع كويس جدا للفضائيات وحتى بتابع "الجزيرة" أى نعم هية قناة متشددة حبتين ضدنا لكن الناس اللى فيها بحب أسمعهم واقول ياريت ولادنا يبقوا زيهم كنّا كسرنا الدنيا.

أبوالمعالى: سيادتك بتابع ماتشات الكورة

السيد الرئيس: إييييييييييييييييه انت بتفكرنا بأيام زمان لما كنت بخنصر من مصروف المدرسة علشان اروح الاستاد واجيب التذكرة كانت بحوالى كانت رخيصة جدا وكنت اروح واشجع بس مكنتش متعصب لحد كنت باشجع اللعبة الحلوة.

أبوالمعالى: وطالما اننا  جبنا سيرة الكورة تقييم سعادتك لمباراة أم درمان

السيد الريس: مباراة أم درمان تقصد اللى كانت بين مصر والشقيقة الجزائر.

أبوالمعالى: والجزاير لسة برضوا شقيقة يا ريس.

السيد الرئيس: شوف "المصارين فى البطن" بتتخانق مع بعضها وفيه ناس بتحب "تبوظ" وفيه قنوات مش فاهمه وطلعت ناس تقول كلام فى كلام ودول شباب يعنى الموضوع كبر حبتين،وكان لازم نتدخل والأيام هتنسى الناس من الطرفين كل حاجة.

أبوالمعالى: انا حاسس إنى ضيعت وقتك فى موضوع الكورة،لكن تواضع فخامتكم أطمعنى فى إطالة الوقت مع فخامتك واستسمحك ندخل فى الشئون السياسية والداخلية.

السيد الرئيس: وماله تفضل مفيش مشاكل عاوز تبدأ منين ؟

أبوالمعالى: نبدأ من انتخابات مجلس الشعب القادمة،وندخل فى الموضوع مباشر سعادتك فى خطاب عيد العمال وعدت بأن الانتخابات ستكون نزيهة وشفافة وكنت تقصد انتخابات الشورى،لكن بعض المغرضين قالوا حدث تزوير فى الانتخابات وإن الإخوان لم يحصلوا على أى مقعد بسبب التزوير.

السيد الرئيس: كل انتخابات لازم يخرج البعض ويتهمنا بالتزوير طيب فيه أربعة نجحوا من أحزاب المعارضة دول احنا زورنا لهم الانتخابات؟ وبعدين الجماعة المحظورة دى جماعة لو أخدت كل المقاعد هتقول الانتخابات مزورة ولو سألتهم اتزورت ازاى وانتم واخدين كل المقاعد هيقولوا الحكومة غلطت فى التزوير والاسماء اتلخبطت وممكن يقولوا إن ربنا وقف معاهم وعمى قلب الحكومة يعنى فى كل الحالات الحكومة متهمة بالتزوير.

أبوالمعالى: تقصد فخامتك إن "مفيش" تزوير وإنها إشاعات مغرضة.

السيد الرئيس: نحن لا نقبل أى تزوير فى أى انتخابات ولو فيه تزوير كانت النتيجة طلعت فى انتخابات الرئاسة أكبر من كده بكتير وأنا اديت تعليمات للحكومة يخلّوا النتيجة كما هى ويعلنوها كما هى .


أبوالمعالى: هل هذا يعنى أنهم كانوا قبل ذلك يعلنوا نتائج غير الموجودة ؟

السيد الرئيس: إنت خلصت الأسئلة ولا فيه أسئلة تانى؟

أبوالمعالى: سألت سيادتك عن الحكومة هل كانت تقول النتائج غير الحقيقية قبل تعليمات فخامتكم .

السيد الرئيس: إنت قلت إن فيه كام سؤال تانى؟

أبوالمعالى: أفهم من فخامتكم أنك لا تريد الرد على السؤال السابق

السيد الرئيس: إيه أخبار الجو النهاردة .

أبوالمعالى: لدى سؤال يشغل الرأى العام خاص بنجل فخامتكم حول ترشحه لرئاسة مصر،وهل تقبل لنجلكم أن يكون رئيسا لمصر فى ظل هذا الوضع

السيد الرئيس: ده موضوع سابق لأوانه وأنا صرحت فى السابق أنى سأحكم مصر حتى آخر نفس مش رغبة فى الحكم،لكن دى مسئولية وأنا لا أستطيع أن أخيب آمال الشعب وقررت أنى لن أتركه وبعدين جمال شأنه شأن أى شاب مصرى إذا انطبقت عليه شروط الترشيح وعاوز يترشح يترشح،لكن لو منطبئتش عليه الشروط يبقى محدش هينفعه.

أبوالمعالى: لكن بعض الإشاعات فى الشارع تقول أن التعديل الأخير فى الدستور لا ينطبق إلا على نجل فخامتكم.

السيد الرئيس: هو الدستور ده أنا عملته فى بيتنا ولا عرضناه للاستفتاء والشعب وافق عليه انا مع اختيار الشعب ولا أقبل أبدا أى خروج على إرادة الشعب وجمال أو علاء شأنهم شأن أى مواطن عادى واللى عاوز يرشح نفسه حسب الدستور أهلا وسهلا،لكن لا نقبل أن يملى علينا أحد شروطه .

أبوالمعالى: هل تقصد فخامتكم بموضوع إملاء الشروط الدكتور البرادعى ؟

السيد الرئيس: الدكتور مين

أبوالمعالى: الدكتور محمد البرادعى

السيد الرئيس: ده إيه واحد عاوز يرشح نفسه للرئاسة من عندنا فى مصر لو كان مصرى وتنطبق عليه الشروط يتفضل يرشح نفسه آه آه الدكتور البرادعى ده رجل مصرى صميم ،لكن اللى بيعمله ده كان سابه لحد تانى أنا كنت فاكره ملوش فى السياسة ومعرفش من امتى دخل معترك السياسة ولو كان دخل البيت من بابه كنت رسيته على "الفولة" لكن هو اختار طريق مش هيوصله لحاجة وهنشوف واحنا معندناش مانع يترشح أمال احنا عملنا تعديل المادة 76 ليه علشان أى واحد شايف فى نفسه يقدر يتحمل مسئولية وطن يتقدم بس بالقانون مش بالفضائيات ولا المتاجرة بالغلابة ولا ببعض أخطاء الشرطة.

أبوالمعالى: والمستقلين يا فندم،والمادة 77

السيد الرئيس: الدستور وضع كل الضمانات لأى مواطن فى مصر يترشح أنا مع التعددية والديمقراطية ولا عودة للوراء ولو انت عاوز ترشح نفسك حسب الدستور مفيش حد يقدر يمنعك.وأكيد المادة 77 هتنفعك هههههههههههههههه ولا إيه دى مادة لاصقة وأنا معرفش المعارضة مش عاوزة المادة 77 ليه وهمه "متبتين" فى رئاسة أحزابهم أمال لو نجحوا فى رئاسة مصر هيعملوا إيه .

أبوالمعالى: لكن فخامتكم تعلم أن المستقلين وضعت لهم شروط يعتبرها البعض شروط يستحيل تنفيذها.

السيد الرئيس: من يريد أن يكون رئيسا لمصر يجب عليه أن يكون قادر على تحقيق الشروط هو هيترشح لجمعية تعاونية ولا فى مجلس محلى لقرية دى مصر.

أبوالمعالى: نترك موضوع الرئاسة ونتحول إلى موضوع آخر وهو المعتقلين وقانون الطوارئ هل يوجد فى مصر معتقلون سياسيون أو سجناء رأى؟

السيد الرئيس: اولا قانون الطوارئ بيطبق على الإرهابيين وتجار المخدرات ولا يوجد فى مصر معتقل سياسى واحد وسأوجه تعليمات للمسئولين بالإفراج عن أى واحد ليس له صلة بالإرهاب أو المخدرات،واحنا عندنا فى مصر قضاء مستقل لا يتدخل فيه أحد.وانت نفسك كل يوم تقول اللى انت عاوز تقوله حد قرب منك احنا بنتقدم فى الحرية ولا رجعة للوراء.

أبوالمعالى: طيب إذا كان الأمر كذلك لماذا المحاكمات العسكرية للمدنيين ؟

السيد الرئيس: هذه أمور تتعلق بأمن الدولة وأنا لأسمح بأى مساس بأمن مصر ..أمن مصر خط أحمر وأنا عارف إنت تقصد مين،لكن أوعدك أن مجدى حسين سيقضى رمضان أو بالكتير العيد فى منزله.

أبوالمعالى: فخامتك عرفت ماذا أريد أن أقول،وهذا يعنى أنك متابع لكل صغيرة وكبيرة فى مصر.

السيد الرئيس: هذه مسئولية دى مصر وكلنا خدام لمصر.

أبوالمعالى: حينما يأتيك تقرير بأن العشرات يقفون فى وسط القاهرة ويهتفون: "يسقط يسقط حسنى مبارك" ماذا يكون رد فعل فخامتكم؟


السيد الرئيس: بالعكس أنا باكون مبسوط جدا إن فيه فى مصر ناس بتعبر عن رأيها ودول العشرات من المصريين أو حتى يكون المئات ومصر فيها 80 مليون وبعدين ربنا نفسه مفيش عليه إجماع وبعدين ربنا هيعذب اللى لم يؤمن به يوم القيامة،لكن أنا سايب الناس تعبر بحرية كاملة طالما التعبير سلمى،وما ليك على حلفان لو خرج 5 مليون من الـ80 مليون قالوا احنا مش عاوزينك يا ريس هقولهم شكرا سلام عليكم ونعمل انتخابات رئاسية واللى يختاره الشعب انا معاه يختاروا جمال يختاروا أى واحد يعجبهم مش لازم جمال أى حد تانى يكون فاهم سياسة ومتربى فى بيت سياسة،وله أسرة سياسية وكلامى مش معناه أنى باقول جمال لأ أنا أقصد لمّا يكون واحد عاش فى جو تشبع فى تحمل المسئولية يكون أفضل.أنا عارف إن صحف المعارضة بكرة هتخرج علينا وتقول إن الريس كان يقصد ابنه جمال .

أبوالمعالى: احنا كده هنصدر الديمقراطية للعالم يا فندم.

السيد الرئيس: احنا سبقنا العالم فى الديمقراطية يعنى أمريكا مثلا فيها كام حزب حزبين اتنين واحد جمهورى وواحد ديمقراطى شوف مصر فيها كم حزب حوالى 25 حزب كلها أحزاب معارضة.

أبوالمعالى: لكنها أحزاب لا يسمع بها أحد

السيد الرئيس: هذه مشكلة الشعب أنه لا يسمع،هذه أحزاب خرجت بموافقة لجنة شئون الأحزاب أو بحكم محكمة إذا كانت هذه الأحزاب تمجد فى الحزب الوطنى فكل حزب حر فيما يرى وهذه هى الحرية يعنى لازم الحزب يبهدل ويشتم الحزب الوطنى حتى يقال إنه حزب معارض،هو بس حزب العمل اللى ماشى عكس الأحزاب كلها عنده كام واحد كل شوية واقفين فى حتة يطالبوا بالإفراج عن مجدى حسين وأنا أوعدك إن مجدى حسين سيخرج قريبا بعد قضاء ثلاثة أرباع المدة حسب القانون وبعدين احنا خايفيين على مجدى حسين احنا بنحميه،بس اللى إيده فى الميه مش زى اللى إيده فى النار محدش عارف حاجة،وحكاية السنة الجديدة دى احنا هنشوفها وزى ما جت هتروح طمئن الناس واحنا مش غاويين نحبس حد

أبوالمعالى: يافندم هذا كرم من فخامتكم،لكن مجدى حسين لم يرتكب جرما حتى يحاكم عسكريا هذا رأى المحللين ومنهم من يرى أن الدولة تريد بقاءه فى السجن حتى تمر انتخابات الشعب والرئاسة،وبعدين مجدى حسين مريض ولو حدث له مكروه لن يمر سهل داخليا وخارجيا،وظروف حبسه فى هذا الصيف صعبة جدا وحتى أكون صريحا أنا خايف على مجدى يموت فى السجن ولا تؤاخذنى إن قلت لفخامتكم أنك ستكون مسئول مسئولية مباشرة عن حياته وسامحنى على جرأتى فى طرح هذا الكلام فضلا عن مضادرة جريدة الشعب،وتجميد حزب العمل وكلها أمور تتنافى مع اليمقراطية برجاء المعذرة لجرأتى.

السيد الرئيس: لا عادى جدا وأنا قلت لك إنه يوم المصارحة وربنا ميجبش حاجة وحشة وبعدين السجون فى مصر وضعها بقى أحسن بكتير من زمان وزمانك رحتها وشفتها ع الطبيعة،هو مجدى ناوى يرشح نفسه للرئاسة هو تنطبق عليه شروط الترشيح والله لو تنطبق عليه يبقى حاجة حلوة خالص ويثرى العملية السياسية بس يشوف مين يجمع له توقيعات المحليات ومجلسى الشعب والشورى وباقى الشروط .

أبوالمعالى: يعنى فخامتكم تتفق معى أن شروط الترشيح تكاد تكون مستحيلة أن يحصل عليها أحد .

السيد الرئيس: طبعا كان بودى أن يطول اللقاء معك لكى نشرح للشعب حاجات كتيرة جدا،لكن عندى زيارة خارج مصر للإطمئنان على الجاليات المصرية هناك .

أبوالمعالى: يعنى نريد أن نطمئن الشعب على أن الزيارة ليس لها صلة بصحة حضرتك وأنا شايف إن الحمد لله الصحة عال العال .

السيد الرئيس: الصحة "بمب" والحمد لله وإن شاء الله فى الفترة الرئاسية القادمة سأفكر فيمن يتحمل هذه المسئولية الكبيرة

أبوالمعالى: كان عندى بعض الأسئلة والاستفسارات الأخرى مثل علاقتنا مع بعض الدول الإسلامية والعربية،وعلاقة مصر بالعدو الصهيونى،والبرنامج النووى،والأسعار،وغزة،والطوارئ،والتعذيب وغيرها من الأمور التى تهم الشارع المصرى.


السيد الرئيس: هذه مواضيع عاوزة فترة رئاسية أخرى غير القادمة لأنها مواضيع انا وضعتها فى خطة وبرنامج إذا كان فى العمر بقية .

أبوالمعالى: اشكر فخامتكم سيادة الرئيس على هذا الوقت الذى أتحته لى .




السيد الرئيس: لا أنا أشكرك إنك هتنشر هذا اللقاء على مدونة لقمة عيش بس لازم تعملوا نقابة للمدونين ولا تسمحوا أن يراقبكم أحد إلا رقابة ضمائركم،وأنا شايف إن مستقبل الصحافة هيكون فى التدوين وربنا يكفيكم شر قوانين تقييد الحريات أنا مع حرية الصحافة ولم يكسر قلم فى عهدى .


أبوالمعالى: سيادتك هناك جريدة أظن اسمها "الشعب" من عام 2000 وهى مصادرة يبدو أن مشاغل حضرتك أنستك جريدة الشعب وفخامتكم قلت أنه فى عهدى لا يحبس صحافى لرأى،وحضرتك تعلم أن الجريدة ورئيس تحريرها لا صوت لهم منذ مايو 2000 هل هناك من يحاول إحراجك ممن حولك.

السيد الريس: هذه أمور بسيطة وستحل فى وقتها والحل قادم قريب جدا

الصلاة خير من النوم ..الصلاة خير من النوم


أبوالمعالى: الله أكبر ماشاء الله



أم العيال: خير يا أبو عمار.. إنت كنت بتحلم ولا إيه قوم الفجر أذن .


أبوالمعالى: خير اللهم اجعله خير أنا فعلا كنت فى حلم وعامل لقاء مع السيد الرئيس ووعد بالإفراج عن مجدى حسين


أم العيال: طيب قوم اتوضأ وصلى ركعتين لله وادعى ربنا بصلاح الحال ومتنساش وانت راجع تجيب بجنيه عيش واوعى لسانك يزلف بالحلم ده قدام حد.


أبوالمعالى: ليه هى الأحلام منعوها يا أم عمار.



أم العيال: لا خايفة عليك من الحسد فيه حد فى مصر يقدر يحلم حتى بشيخ الخفر،وانت تحلم بالرئيس مرة واحدة وتعمل معاه لقاء ربنا يستر على المدونة .


أبوالمعالى: أشهد أن لا إله إلا الله وأشهد أن محمدا رسول الله أصبحنا وأصبح المللك لله خير خير إن شاء الله خير اللهم اجعله خير.






10 التعليقات:

الشاذلى امين الشاذلى يقول...

الله الله يا أستاذ ابو حماس ما كنتش اعرف انك اديب وروائى كبير كده اه الحلاوه دى يا باشا و الله كونت مشغول الان ولكن شدنى الموضوع ثم الحوار و التسلسل و الله كانت لى فكره ( وحلمت انى الرئيس) شكرا لك والى الامام ان شاء الله

غير معرف يقول...

انا بجد مش عارفه اقول ايه الله عليك بجد بس كان نفسى الحوار ده يكون بجد انا صدقته والله جد وياريت الحلم ده يتحقق زى ما بنحلم باى حلم ونبقى عاوزين نحققه واقولك ابو المعالى انت عسليه ههههههههههه

حبيبه يقول...

الله عليك ابو المعالى اسم على مسمى انا بجد صدقت الحوار وكنت مستغربه انت ايه ولا المؤلفين بس بجد ربنا يفتح عليك وتقابل الريس بجد ويكون صدره رحب والحلم يتحقق حضرتك قدمت اسئله بجد جامده وحساسه ربنا يحفظك انت بجد انسان محترم

حبيبه يقول...

انا بجد مش عارفه اقول ايه الله عليك بجد بس كان نفسى الحوار ده يكون بجد انا صدقته والله جد وياريت الحلم ده يتحقق زى ما بنحلم باى حلم ونبقى عاوزين نحققه واقولك ابو المعالى انت عسليه ههههههههههه

جايدا العزيزي يقول...

هههههههه

من النوان عرفت انه حلم فى منام


ولا جايز العقل الباطن كان مرهق وتعبان


بس اللى شدنى اكتر تنسيق الحوار


انت استاذ ومتمكن وافكارك من نار


دمت مبدعا

Unknown يقول...

حقيقة أشكر الأساتذة الذين علقوا الأخ الفاضل الأستاذ أمين الشاذلى والأخت الفاضلة حبيبة شاعرة العامية والأستاذة جايدى التى من كلماتها تبدواوكأنها شاعرة شكرا لكم جميعا على اهتمامكم بالحياة السياسية.وما يدور فيها حتى لو كان أحلام.

Sydney Hassan يقول...

ههههههههههههههههه الصراحة مُحبكة اوى وانا صدقتها لدرجة ان انا مكنتش فاضية اخلصها اول مرة بس دورت تانى على لينك المدونة لحد ما جيبتها عشان اكمل الحوار وكنت فاكراه بجد
بس جميلة جدا تسلم ايديك.

أ.محمد هريدى يقول...

بسم اللله ماشاء الله
فى تقدم مستمر يا أستاذ ابو المعالى

حياة يقول...

الله يا عم ابو المعالى على حلمك والله انا كنت قربت اصدق بعد ما كنت متأكده انه حلم لانه فعلا حلم حتى الكلام اللى فيه ما أظنش إنه هيبقى حقيقة والله أعلم

Unknown يقول...

يا أستاذة حياة ده حسنى مبارك خلاص هيرحل وانت لسة بتقرأى الموضوع النهارده. شكرا لزيارة المدونة

تقبلى تحياتى

إرسال تعليق