مرحبا بكم أعزائى زوّار مدونة لقمة عيش ، ونلفت الانتباه إلى أن جميع المقالات المنشورة خاصة بصاحب ومحرر المدونة مالم يشار إلى إسم أو مصدر آخر - مع خالص تحيات المحرر: أبوالمعالى فائق

السبت، 26 سبتمبر 2009

5 على مسئولية وكيل لجنة التعليم بمجلس الشعب .. لا خوف من انفلونزا الخنازير على المصريين

فى لقاء عبر شاشة القناة الأولى عصر يوم السبت الموافق 26/9/2009 صرح الدكتور سيد الفيومى - وكيل لجنة التعليم بمجلس الشعب بأنه لا خطر من انفلونزا الخنازير على المجتمع المصرى واجتماع يوم الاثنين القادم للتعليم والصحة بالمجلس .
الوكيل : يوم الاتنين القادم يوم حاسم لطمأنة الناس
الوكيل : القصة والوهم اللى اتقال إن مقابر جماعية ومش هنودى ولادنا المدارس كلام مش مظبوط



الوكيل : يوم الاتنين يوم حاسم
الوكيل : العمرة السنادى كانت 3 مليون ولم تحدث أى إصابة
الوكيل : الموضوع زاد عن حده " أوى " الموضوع عادى جدا
المذيعة : مكبّرين الموضوع شوية
الوكيل : الطلبة 17 مليون ما قبل الجامعة و2 مليون جامعى الموضوع بسيط جدا
الوكيل : إحنا بنعانى من مشكلة النظافة فى مصر كلنا .


الوكيل : لحد الآن مفيش مصل واقى والمصل الموجود له أضرار

وقد بدأ الدكتور سيد الفيومى وكيل لجنة التعليم بمجلس الشعب حواره بأن : الموضوع زاد عن حده " أوى " وأن الموضوع عادى جدا . المذيعة : مكبرين الموضوع شوية
الوكيل : جدا جدا جدا .
المذيعة : والله !
الوكيل : الحقيقة أنا عاوز أقول حاجة أمثلة كده بسيطة .. إحنا عندنا عدد مدارسنا الحكومية 42 ألف مدرسة و7 آلاف مدرسة خاصة يعنى 50 ألف .
المذيعة : والفصل 60/70 واحد .
الوكيل : الطلبة 17 مليون ما قبل الجامعة و2 مليون جامعى الموضوع بسيط جدا ولكن احنا بنقول عاوزين نستفيد من الأزمة احنا بنئول إن نسبة الإصابة فى مصر يعنى نسبة عادية جدا يمكن احنا عندنا الإنفلونزا العادية نتائجها أو النتيجة اللى ممكن توصلنا إليها أخطر من انفلونزا الخنازير ولكن هو الخوف كله من تحور انفلونزا الخنازير بس ، بدليل إن العمرة السنادى كانت 3 مليون ولم تحدث أى إصابة واحنا جتلنا الحالات اللى رجعت من المصريين محصلش نتيجة ولا حالة منهم مثال تانى كان فيه عندنا فى رمضان اللى فات حفلة فى الأبرا فيها 60 ألف وعندنا من قريب مباريات بطولة الناشئين حضرها الريس فى برج العرب 80 ألف ومفيش حاجة ومفيش مشكلة ولكن هو التخوف اللى الناس فيه غير عادى .. الموضوع عادى جدا .
المذيعة : بس فيه نقطة مهمة هنا أماكن مفتوحة مش فصول مغلقة وبعدين الشتا جاية
الوكيل : أقول حاجة على حتة الشتا البلاد اللى جنب المكسيك بلاد جوها شتوى فى الفترة دى الدراسية وأيضا الأمور عادية عندهم يعنى أصدى الشتا جايلنا إحنا همه كان عندهم شتا بلاد عندها شتا وعندها جو بارد والأمور عادية جدا عندك معلومات على الإنترنت أو أى اتصال بالموجودين فى الخارج فى انجلترا وفى أوربا وفى أمريكا واستراليا يعنى أمور عادية احنا كل اللى أصيب شبه إصابة بانفلونزا حوالى 800 حالة من 80 مليون ولكن مفيش
المذيعة : مهو 800 حالة مش شوية
الوكيل : لأ .. لأ ده اشتباه مش إصابة وحالتين وفاة كان عندهم مرض قلب وخلافه وليس وفاة لنتيجة مباشرة من إصابة الإنفلونزا كان ممكن تموت من أى حاجة لكن هى أصلا مريضة بأشياء أخرى يعنى مش عاوزين نخوف الناس فى هذا الموضوع ولكن الأزمة نستفيد منها فى نقاط مهمة جدا أولا النظافة بصفة عامة فى المجتمع سواء فى البيت فى المدرسة إحنا بنعانى من مشكلة النظافة فى مصر كلنا .. المدارس نفسها المدارس النظافة فيها فى غاية الأهمية .. المدرسة النهاردة مشكلتها إيه مع وزارة التربية والتعليم إن النهاردة مفيش عمال نظافة فى المدرسة حتى المتعين من المعاقين مبيأديش نظافة إحنا عاوزين وزارة التربية والتعليم تحط عمال نظافة حتى 2 فى كل مدرسة عاوزين 100 ألف عامل لان احنا عندنا 50 ألف مدرسة فالوزارة تدبرلنا 100 ألف عامل ميزانية لوزراة التربية والتعليم من وزارة المالية علشان تقدر تدفع مرتبات للنضافة والأسرة تكون بإيدها معانا احنا عاملين اجتماع يوم الاتنين الجاى فى لجنة التعليم والبحث العلمى ولجنة الصحة كمان احنا جايين نقول للناس جايبين كل المختصين فى مجال الطب فى مصر فى المراكز البحثية ووزارة الصحة جايين نقول الحقائق العلمية نحطها قدام الناس عشان تعرف الحقيقة العلمية .. الحقيقة العلمية أن هذا المرض ليس بهذا القدر من التخويف ولكن يجب أن تكون نظام ونظافة مش عشان انفلونزا الخنازير دائم فى مدارسنا وبيوتنا وفى مجتمعنا ويجب أن نحافظ ولا نترعب كده .
المذيعة ليه المجلس مفكرش يؤجل المدارس شوية لحد المصل الواقى ما ييجى ؟
الوكيل : لحد الآن مفيش مصل واقى والمصل الموجود له أضرار ولم يجرب وكثير من الدول رافضة تقول أضراره الجانبية وبالتالى الموضوع من البساطة أنى أنا أقول مش عاوز مصل ولا حاجة ، القصة والوهم اللى اتقال إن مقابر جماعية ومش هنودى ولادنا المدارس كلام مش مظبوط احنا عاملين الاجتماع ده عشان نتكلم كلام علمى الاجتماع ده مهم جدا يوم الاتنين اللى جاى حاضر كل مختصين اساتذة مصر وباحثين مصر رجال التربية والتعليم رجال الصحة عشان نخرج بنتائج عشان نطمن الناس .
المذيعة: هل فيه احتمالات المدارس تتأجل خلال الأسبوع الجاى ولا لأ ؟
الوكيل : لا يوجد احتمالات للتأجيل إطلاقا نهائى ، ومهمة الإعلام أن يعيد القلق زى ما عمله ولا تضحية بالأولاد اللى عمل القلق الإعلام فعلى الإعلام أن يركز على النظافة وإذا كان فى الفصل 60/70 واحد فرصة نركز على الجودة ومن مبادئ الجودة أن يكون فى الفصل من 30 إلى 35 تلميذ أو طالب فرصة نقلل ونشتغل 3 أيام ونلتزم بيوم كامل ، وعندنا يوم الاتنين يوم حاسم لطمأنة الناس ومفيش تأجيل ولا بد أن نكون حذرين فى النظافة حذرين فى الانضباط حذرين فى الازدحام ولا يوجد أى خطر موجود النهاردة

5 التعليقات:

Bella يقول...

الواحد مش عارف يقول ايه

يعني تضارب في التصريحات والناس مش عارفة ايه القصة اصلا ولا شفنا لهم حملة توعية ولا اي حاجة

غير تلال الزبالة المنتشرة في كل احياء القاهرة والجيزة

يعني اليمن اجلت الدراسة اسبوع وفي نفس الوقت ح تبتدي تطعم كل الطلبة والتلاميذ والعاملين في مجال التعليم ومصر حتى الىن لاحس ولا خبر

حتى في الجامعات لم يجتمع بنا طبيب واحد يعرفنا ماهية المرض وكيفية التعامل معه والوقاية والتعامل مع اي اصابات محتملة او كيف يتعرف الناس على المصاب ويفرقوا بينه وبين المصاب بانفلونزا عادية

اعتقد والله اعلم ان تصريحات هذا السيد الهمام لاتخرج عن كونها ضحك على الدقون كالعادة ويبدو ان المنحة التي اعلنت عنها امريكا لدعم مصر لمواجهة المرض هي المحرك الاكبر والدافع لاصرار الوزير على بداية الدراسة في هذا الموعد حتى يضع يده على المبلغ وليكن مايكون

الواحد حاسس بزهق

Unknown يقول...

سنرى اجتماع يوم الاثنين ماذ سيحدث فيه والدولة الآن متضاربة فى مواقفها فوزير الصحة يقول كلام وكيل التعليم فى المجلس يقول كلام والضحية فى النهاية هو المواطن .

Bella يقول...

ربنا يستر

عندنا اجتماع في الكلية بكرة وح اشوف ح يحصل ايه

بس الوضع العام غير مطمئن صراحة

Unknown يقول...

يا ريت لو فيه أى معلومات مفيدة للمواطن تنقليها لنا .

Bella يقول...

طبعا

بس المهم احنا توصل لنا معلومة

انا وقع تحت ايدي رسالة على الفيس بوك ومش عارفة مدى دقة المعلومات الواردة فيها

وخايفة لو مانشرتهاش ابقى باحجب معلومات مهمة

او لو نشرتها وكانت مش صحيحة او غير دقيقة اكون باروج لمعلومات تثير الفزع

محتارة

إرسال تعليق