0 أكبر حزب فى مصر ،الحزب الذى فوق الجميع - فيديو

لقد أنهى كل الخلافات السياسية والاقتصادية والاجتماعية وكل ما يخطر على بالك فى مصر،لا تقل معارضة،ولا تقل حزب وطنى ولا تقل البرادعى ولا تقل مجدى حسين ولا على الدين هلال ولا حتى جمال مبارك خلاص كل الأمور تم حسمها فى القلعة الحمراء وأصبح النادى الأهلى حسب أغنية المطرب إيهاب توفيق أنه فوق الجميع،والأخ جدو والسيد سمير زاهر الكابتن شوبير،وخالد سعيد ،والمخبرين ومظاهرات كل الأطراف المؤيدة والمعارضة ،طبعا أنا باكتب على طريقة إنى أنا برضه فوق الجميع ومدونتى فوق الجميع وحتى فوق النائب المشتاق،طبعا لا أحد يعرف من هو النائب المشتاق،والنائب المشتاق ده مصطلح أنا سرقته من الأخ عوضين،لكن لو حد عاوز يعرفه ممكن أعرفه،ولأنى قليل الأدب حسب نظرية الدكتور على الدين هلال فأنا عاوز أعرف مين مرشح الحزب الوطنى للرئاسة حتى أحدد موقفى من الحركات السياسية ومؤتمر الإخوان والمعارضة ،وبالمناسبة يا حضرات أنا مستغرب جدا لسكوت الحزب الوطنى على تصريحات الدكتور على الدين هلال،لأنه "خبط فى الحلل" وحكاية "قلة الأدب"،"وهزؤ" أول ما تنطبق تنطبق على بتوع الحزب الوطنى حسب كلام الدكتور "على" وأنا بانقل وناقل الشتائم ليس بشاتم أو شتّام لأن تعديل الدستور فى 2005 مين اللى عدله مع العلم كانت التصريحات قبل التعديل تصف من يتحدث عن أى تعديل فى الدستور بأنه خائن أو ما شابه،وهناك من قال من الحزب الوطنى أن الإعلان عن مرشح الحزب للرئاسة سيكون فى منتصف العام المقبل،وهذا له عدة تفسيرات إما أن يكون الحزب الوطنى كل قيادة فيه بتتصرف من دماغها،أو أن الرئيس مبارك سيترك الحكم فى منتص العام المقبل،ومن ثم لا بد من الإعلان عن اسم المرشح للرئاسة بجد أنا حاسس إن النوايا مش خالصة عند بتوع الحزب الوطنى،وبصراحة بدأت أتعاطف مع الرئيس مبارك وحاسس إن معاه شوية نيتهم "مش ولا بد" ممكن واح يقول إنت عاوز تضرب كرسى فى الكلوب أقول هو فين الكلوب دى الدنيا ضلمة خالص آخر حاجة كلما أشاهد بعض القنوات وبرامجها  ومتصلينها وبعض ضيوفها أقول الله يرحم أيام محمود سلطان وأحمد سمير وعلى فكرة الأستاذ محمود سلطان مجمد عضويته فى الحزب الوطنى لأسباب الانتخابات والموضوع ده له حكاية تانية لكن لأنى أتكلم بنظرية سمك لبن تمر هندى فلا تؤاخذونى على اللعبكة المتعمدة والمستمدة من لعبكة الأوضاع حوالينا والصفقات اللى تتم ولأن الأهلى أصبح فوق الجميع يبقى كل واحد يلحق وينضم لحزب الأهلى قبل الاستمارات ما تخلص وكل واحد يخلص الكلام اللى عنده لأن الأيام اللى جاية أنا حاسس إنها هتكون "زفت" ليه معرفش عندى شعور بالقلق من اللى جاى والسبب فى الحكاية دى الحزب الوطنى والفضائيات الدينية والاتنين بيغنوا على بعض علشان كده يا رجالة لازم كلنا ننضم للحزب اللى فوق الجميع اللى هو إيه مين يجاوب؟؟ والله أنا عارف انى باستظرف وشكلى مينفعش فى الاستظراف،لكن أهه الكل بيستظرف وده شعار المرحلة .

أغنية الأهلى فوق الجميع