مرحبا بكم أعزائى زوّار مدونة لقمة عيش ، ونلفت الانتباه إلى أن جميع المقالات المنشورة خاصة بصاحب ومحرر المدونة مالم يشار إلى إسم أو مصدر آخر - مع خالص تحيات المحرر: أبوالمعالى فائق

الأحد، 11 مايو، 2014

2 الانتخابات الرئاسية وكأس العالم


     شوفوا يا جماعة من الآخر ومحدش يزعل والكلام ده لمرشحيى الرئاسة،طبعا انتم عارفين إن مباريات كأس العالم ستقام فى الفترة من 12 يونية وحتى 13 يوليو،وبعيد عن التقشف،وبعيد عن الكلام "المجعلص" بتاع لم الأصوات،وبعيد عن الشعارات اللى ضيعت فلسطين،المرشح اللى هيضمن إذاعة مباريات كأس العالم على التلفزيون المصرى هديلو صوتى،وهياخد أصوات بالغلق تشتروا حق البث وتفرحوا الشعب شوية وتخصموا التكلفة من حوافز الموظفين،تشتركوا فى الجزيرة الرياضية،تكسروا شفرة الجزيرة الرياضية،تسرقوا بث الجزيرة الرياضية،ترفع عليكم الحزيرة الرياضية قضية وتكسبها كله ده ميلزمنيش اللى يلزمنى أشوف 64 مباراة فى البيت نخصم منهم كام مباراة لزوم قطع الكهربا مش مشكلةعلشان ميجيش مرشح ناصح ويقول أنا هأعمل شاشات عرض فى الشارع.
***
تخيلوا قلت اسأل على باقة كأس العالم كنت فاكر يعنى هتبقى بحوالى سبعين تمانين بالكتير 100 جنيه قلت نقضى شهر "الكاس" فول وطعمية مش مشكلة،لقيت الأشتراك والجهاز إجبارى وبعد العرض والخصم حوالى 2300 جنيه بالزمة ده كلام إلهى يارب مبرمجى الجزيرة الرياضية ينصابوا بالزهايمر المؤقت وميعرفوش يشفروا القنوات وإذا مكنش كده،ياريت نصطلح مع قطر لمدة شهر،وياريت الجزيرة مباشر مصر تسكت شوية فى الشهر ده وبعد كأس العالم ما يخلص يحلها ربنا،وعلى فكرة كأس العالم ده مسألة أمن قومى،ومليكوا عليا حلفان لو حسنى مبارك كان لسة رئيس كنا هنشوف كأس العالم فى بيوتنا وببلاش.

2 التعليقات:

Khalid Morsy يقول...

كلام منطقي وعقلاني لكن المنطق بيقول كل مسئولي الدولة بيتفننوا في تعذيب المواطن المصري من متي يبحثوا عن مايسعده

الواحات للسياحه يقول...

http://www.elwahattravel.com/

إرسال تعليق