0 عيسى نبى وموسى نبى ومحمد نبى واللى ليه نبى يصلى عليه

كل عام وحضراتكم بخير بمناسبة المولد النبوى الشريف ، وعيسى نبى وموسى نبى ومحمد خاتم الأنبياء والمرسلين عليهم جميعا أفضل الصلاة وأزكى السلام " واللى ليه نبى يصلى عليه " ويارب يأتى العام القادم وتكون سجون مصر خالية من أى معتقل سياسى أو محاكم عسكرية ، وكمان تكون خالية من أى قانون يقمع الحريات ، يا رب نكون جميعا فى العام القادم فى ظل دستور يحفظ حق المواطن فى انتخابات حرة نزيهة بعيدا عن تقفيل الصناديق بالجنازير والسنج ، يارب فى العام القادم نشوف رئيس مصرى جاء عبر الشعب وينزل ويمشى فى الشوارع من غير حراسة ويسلم على المواطنين ويكون همّه اللى بيحموه ، يارب العام القادم يمشى كل مصرى على أرض نظيفة خالية من المطبات والمجارى الطافحة والمواصلات والمواقف العشوائية ولجنة شئون الأحزاب ، يارب العام القادم يطل علينا ونلاقى مذكرة اعتقال من المحكمة الدولية لجورج بوش ، وليفنى ، وأولمرت يارب العام القادم يطل علينا وتكون مصر قد أطلقت سفينة فضائية من على أرض مصرية وبصاروخ فضائى مصرى مية فى المية ، يارب العام القادم يطل علينا ويكون مشايخ الفضائيات تخلصوا من عقدة نفاق الحاكم ونسمعهم وهم يقولون للحاكم " اتق الله يا حاكم " يا رب العام القادم يطل علينا ونجد مرشحة للرئاسة المصرية وتفوز بنسبة 63% ومفيش حد يسألنى " ليه يعنى 63% " المهم لاتكون 99.99 % ، يارب يهل علينا العام القادم ولا نسمع عن خناقة بين مسلم ومسيحى ونعملها طائفية ، يا رب ييجى العام القادم ونشوف مساجد من غير مخبرين ونسمع خطيب يكون عارف اللى بيحصل حواليه ، يارب نشوف العام القادم سجون مصر وقد تحول 75% منها إلى مصانع ومدارس وجامعات ،يارب العام القادم يطل علينا ونرى كتاب مع كل مواطن ، وقبل الأخير يارب العام القادم يهل علينا ونعرف نروح غزة من معبر رفح من غير مشاكل واعتقالات وتحويل إلى محاكمات عسكريات وغرامات وحبسات من السنوات ، يارب الشعب المصرى والعربى يقرأ الكلام ده ويقرر مصيره بنفسه علشان ربنا يستجيب لكل الدعاء