1 حوار بين رجل وزوجته قبل شهر رمضان

قبل دخول شهر رمضان المبارك دار هذا الحوار بين الرجل وزوجته:-

الزوجة: عاوزة أشوف فيديو فيه وحدة بتتكلم عن شهر رمضان.

الزوج : فيديو ايه ده فيديو دينى ولا عن الطبيخ.

الزوجة: طبيخ إيه يا حاج ده شهر العبادات،إنت مبشبعش طبيح.

الزوج : الملافظ سعد يا حرمة وبعدين يعنى الست دى هتقول حاجة جديدة ما انتى بقالك من يوم ما جوزنا وانتى بتسمعى حواديت من المشايخ والشيخات ومغيرش أى حاجة فيكى شكلهم غاويين شهرة...أستغفر الله العظيم.

الزوجة: يعنى إيه .

الزوج : يعنى شهر رمضان أمره بسيط جدا ومش عاوز مواعظ ولا حكم  أكتر من اللى تقال طول عمرنا،هو كلام وخلاص.

الزوجه: أصدك إيه يا حاج .

الزوج : أصدى ان الصيام مش نحرم نفسنا من الأكل والشرب بس وياريت يكون الصوم عن الصوت العالى وكتر الكلام اللى ملوش لزمة.

الزوج : وبعدين أهم حاجة الفطار يعنى ميمنعش إنك تظبطى الفطار علشان مس كل مغرب نتخانق. ونعمل حجتنا اننا مشغولين بسماع الشيخ فلان والشيخة علانة.

الزوجة: همه عيالك بعجبهم حاجة دول يزهئوا اللى ميزهئش،بيطلعونى عن شعورى.

الزوج : علشان كده "بائولك" من يوم ما جوزنا وبتسمعى مواعظ وحكم ومفيش فائدة .

الزوجة: طب أعمل ايه.

الزوج : ايوااااااااااااه هو ده الكلام .... تعملى ايه ... اسمعى يا ست الكل.

الزوجة: وقفت ويدها جانب منتصفها هييييييييييه قول وبسخرية كلى أذن صاغية.

الزوج : مطلوب منك فى الشهر الكريم ده رقم واحد تسامحى الناس كلها عشان أنا حاسس إنك عندك حتة كده مش عجبانى يعنى ممكن تضيعلك رمضان اللى جاى و50 رمضان جايين وكل رمضانات اللى فاتت،والمسامح كريم يا حاجة.

الزوجة: يا ساتر يارب لييه ده ربنا غفور رحيم يا حاج.

الزوج : ياست مقلناش حاجة واحنا كمان لازم نغفر علشان ربنا يغفرلنا،وبعدين الدين مش نقعد نسمع كلام وخلاص لازم نطبق الكلام اللى نسمعه،والقرآن اللى نقرأه الموضوع مش كتر قراية.

الزوجة: طيب اسمعنى....عاوزة اشترى حاجات رمضان بيقولوا الحاجات غالية.

الزوج : خدى ألف جنيه أهم هاتى بيهم حاجات رمضان.

الزوجة: نعم ..نعم .. نعم ... ألف جنيه دول كانوا ايام ستى وستك الله يرحمهم.

الزوج : ألف رحمة ونور تنزل عليهم وفين ايام ستى وستك كانوا على نياتهم وكانت البركة موجودة وكانوا متسامحين،وكانت اللقمة الهنية تقضى مية،ومحلاها "أعدت" الطبلية،والشاى اللى كان بيتغلى مرتين،ولا الكنافة اللى مكنش حد بياكلها إلا فى رمضان ... الله يرحم زمان وأيام زمان.

الزوجة: كان بقى.

الزوج : هيه دى مشكلتنا المفروض يا حجة رمضان ده يكون أقل شهر مصاريف،لكن للأسف بيبقى أكتر شهر مصاريف،وكل الناس تلاقيهم فى رمضان مية مية إلا فى موضوع الأكل ينسوا كل حاجة لا بيحوّء فيهم كلام خطيب المسجد ولا التلفزيون.

الزوجة: طب اسأل خطيب المسجد وشوف عامل ميزانية كام فى شهر رمضان ده غير العزومات اللى بيروحها.

الزوج : احنا سبنا الموضوع المهم ومسكنا فى الأكل والشرب.

الزوجة : وايه المهم بأه.

الزوج : المهم يا حجة إن رمضان لازم نمسك فيه لسانّا ونغفر ونسامح ومنعليش صوتنا على الصغيرة والكبيرة ونعرف إن الكلمة الطيبة صدقة وبخاصة لو كانت للأهل والجيران وكل الناس،ده رمضان الحقيقى.

الزوجة: أنا نويت اختم القرآن السنة دى 3 مرات.

الزوج : أنا ربنا "يئدرنى" بس واختمه مرة ... وبعدين مرة بفهم أبرك من ألف مرة من غير فهم.

الزوج : كنا حننسى أهم حاجة فى رمضان ... زكاة الفطر ربنا "يئدرنا" ونطلعها زيادة.

الزوجة: يارب يمكن هى دى اللى تكون سبب فى دخولنا الجنة..

الزوجة: ادعى يا حاج ربنا يبلغنا رمضان و "يئدرنا" على صومه،وادعى كمان ربنا يحفظ مصر وينجيها من الفتن.

الزوج : اللهم بلغنا رمضان،اللهم احفظ مصر واجمع شمل أهلها وقها شر الفتن ما ظهر منها وما بطن.

الزوجة: اللهم آمين.