0 بعد مشاهدة هذا الفيديو لا داعى للعلم ولا للطب

     بصراحة بعد أن شاهدت تلك القناة التى لا يستعصى أمامها مرض ولا عرض رأيت أن أطالب الحكومة المصرية وكل الحكومات العربية والعالمية أن تصدر قرارا فوريا بمنع التعليم،وغلق كليات الطب،وتحصيل غرامة من كل مواطن يفكر أن يتجه للتعليم،فالشيخ ........ عنده العلاج الشافى لعلاج جميع الأمراض،وغيره من مشايخ كتير عندهم الكبسولة السحرية للقضاء على الصعف الجنسى وخلطة الأعشاب لعلاج العقم وتأخر الإنجاب ،وعلاج البروستاتا النهائى وعلاج تكيسات المبايض،وكله "ده" بالأعشاب لذلك أقترح على أصحاب رؤوس الأموال أن يشتروا الأعشاب ويمروا بيها على المستشفيات ويوزعوا على كل مريض 5 كيلوا أعشاب،وبالمرة رجال الأعمال يقوموا بشراء المستشفيات وسعر المتر يبقى بـ 13 كيلو أعشاب وتحويلها إلى ملاعب "غولف" ومطاعم بيتزا،ويلحقوا يشتروا مستشفى المنشاوى قبل ما أصحابها يخدوها ويدفعوا فيها كام طن أعشاب.

     وبمناسبة ذكرى نكبة فلسطين ملهاش حل عند بتوع فك الأعمال يعنى ممكن يعملوا عمل يحطوه تحت الكنيست الإسرائيلى،ولا حتى يعملوا عمل يربطوا بيه أى حد يقرب من الست ليفنى علشان ينكسف ومحدش يوقعلها على أى تنازلات،طيب أيه رأيكم لو نعمل عمل لأثيوبيا وبدل ما تبنى سد النهضة تروح تبنى مصفى كبيرة وتنتهم منتظرين الميه تتمنع.

     هابقى سعيد لو الجماعة دول عملوا عمل لبتوع الجزيرة الرياضية ويفكوا شفرة مباريات كأس العالم،بجد كل ما شوف الأشكال دى على التلفزيون أقول متى يكون لدينا الوعى الذى عند إسرائيل،آل إيه وعاوزين فلسطين تتحرر،والله الواحد بيبقى عاوز يقول ألفاظ يجارى بها المرحلة بس افتكر "وهل يكب الناس فى النار على مناخرهم إلا حصائد ألسنتهم" فأتراجع، دحنا بقينا فرجه على رأى الفنان دريد لحام فى مسرحيه الرائعة كاسك يا وطن.