هل سعر أردب القمح الذى حددته الحكومة للفلاح الذى يورد القمح للحكومة .. هل يشجع الفلاح على التوريد يذكر أن السيد وزير التضامن الدكتور على المصيلحى قد حدد أسعار أردب القمح حسب جودته من 240 جنيه إلى 250 جنيه ولما كانت مدونة لقمة عيش تهتم بهذا الأمر لم تسكت ولم تتحدث من الخيال بل ذهبت إلى أحد الفلاحين ذوى الخبرة " المعجون بالفلاحة " وكان الحديث والتصوير على الطبيعة فى أرض الفلاح الذى سألته مدونة لقمة عيش عن مصاريف الفدان الواحد للقمح " كام " ومحصول القمح للفدان كم أردب ؟؟
فى البداية قال على زهرى فلاح ومستأجر أرض يزرعها قال الفدان لو صح ممكن يجيب 16 أردب ، لكن فى الغالب بيكون من 13 إلى 15 أردب حسب خدمة الفلاح لأرضه .
طيب يا عم على الفدان ياخد مصاريف كام يعنى ؟
قال على زهرى أكتب ورايا
اول حاجة الفدان يحتاج إلى شيكارتين تقاوى سعر الشيكارة 200جنيه ، وعلشان " نحط " البذور فى الأرض لازم نحرتها وده يكلفنا 150 جنيه ، بعد حرث الأرض نقوم بعملية تحويض الأرض والفدان ياخد 6 أنفار أجرة النفر 20 جنيه يعنى حسبة 120 جنيه وبعدين نسقى الأرض لو المية غمر نحتاج لنفر واحد بـ 30 جنيه ، لكن لو المية بعيدة نحتاج مكنة مية يكلفنا 130 جنيه وبعد الرية الأولى أى بعد 15 يوم نقوم بعزيق الأرض والفدان يحتاج إلى 12 نفر يعنى حسبة 120 جنيه طبعا والكلام مازل للعم على الفدان يحتاج إلى 9 مرات رى يعنى حسبة من 270 إلى 350 جنيه ويجى يوم الحصاد عاوز لوحده 14 نفر وسعره بيزيد فى موسم الحصاد بيكون من 25 : 30 جنيه غير المصاريف يعنى مصاريف الحصاد لوحدها للفدان تدخللها فى 500 جنيه بالتقريب بعد الحصاد يحتاج6 أنفار للم القمح لتجهيزه للدراس يعنى ممكن 150 جنيه وعندك 5 ساعات دراس سعر الساعة 45 جنيه آدى 225 جنيه دراس غير مصاريفهم عاوزة 50 ج أقل حاجة توصيل المحصول للبيت وتحميل التبن وتشوينه يدخل فى 160 ج طبعا كل ده غير إيجار الفدان عن زرعتين بحوالى 3500 ج يبقى نصيب الفدان القمح 1750ج
هذه رواية فلاح عن مصارف الفدان الواحد لزراعة القمح
فلو افترضنا أن الفدان سيكون محصوله 16 أردب وسيكون أعلى جودة بـ 250 ج فكم سيكون ربح الفدان
أرجو ممن يهتمون بالأمر يحسبون .. يجمعون ويطرحون ويقسمون ليروا كم هى مصاريف الفدان الواحد وكم هى إيرادات الفدان الواحد وهل يمكن للفلاح أن يورد
الصورة لصاحب المدونة مع أحد الفلاحين وزارعى القمح
|
|
|
1 التعليقات:
ده فلاح مصرى ولا من دار فور
إرسال تعليق