مرحبا بكم أعزائى زوّار مدونة لقمة عيش ، ونلفت الانتباه إلى أن جميع المقالات المنشورة خاصة بصاحب ومحرر المدونة مالم يشار إلى إسم أو مصدر آخر - مع خالص تحيات المحرر: أبوالمعالى فائق

الخميس، 26 مارس، 2009

2 حوار مهندسة مع سائق تاكسى

من أجل ايصال الدعوة للإضراب قررت ان أكلم كل من أراه أمامي عن الإضراب فقررت مثلا حين أبحث عن تاكسي أركب أحدهم الذين سيتحولون خلال شهور أو أسابيع أو ربما أيام إلى حديد حماده بيه عزو عضو لجنة السياسات كما سماه عم سيد
أنا : السلام عليك .
معم سيد : و عليكم السلام .
و بدأ الطريق و و هو يدخن سجائره عيناه مليئة بالهموم و التعب و اليأس إني أشهد و الشهادة أمام الله إنه سائق بارع رزين يختار الشوارع السلسه حفاظا على سيارته و لاحظت اثناء قيادته ببطء القيادة و حرصه الشديد على سيارته و احترامه الشديد لكل من حوله .. فكأنه يتعمد أن يأخذ حذره من كل مركبة آخرى حفاظا على سيارته .
أنا : ممكن أسأل سؤال؟؟ .
عم سيد :اتفضلي يا آنسه!!! خير .
أنا :هي العربية ديه موديل كم؟؟؟
ضحكة أكثر يأساً فقد فهم ماذا اعني .
عم سيد :هههههههه ليه؟؟
أنا :كنت بسال عشان اعرف هي من العربيات اللي حتتاخد من أصحابها و تتحول لخردة .
عم سيد : من أولهم .. للاسف .
أنا :بس أنا شايفه إنها حالتها ممتازة بالرغم من قدم الموديل .
عم سيد : دول حياخدوها مني ب 5000 جنيه بس و حيبدلوها بواحده .
أنا : طب كده انت كسبان !!!! زعلان ليه .
عم سيد :لأ طبعا خسران دول عايزاني ادفع اقل قسط 878 جنيه كل شهر و لازم ادفع 1200 كل سنة تأمين و 11,5 % فائدة سنوية ليه يعني؟؟؟
أنا : طب مه التأمين ده لمصلحتك .
عم سيد: ازاي يا انسه يعني همه لما يخدوها التوكيل حياخرها 3 او 4 ايام حشتغل ازاي لكن لو انا اخدتها للسمكري بتاعي حتاخد ساعه .. كمان شارطين اني مصلحهاش بره خالص ...... و لو اتاخرت عن قسطين حيسحبوها مني
أنا : طب و انت بيطلعلك منها كم ..؟؟؟؟
عم سيد : انا بيطلعلي يوميا بالكتير قوي 80 جنيه بشيل منهم 30 جنيه للصياانه و 20 جنيه سولار يوميا .. يتبقى كم ؟؟؟
أنا : يتبقى 30 جنيه .
عم سيد : عندي ولد و بنت .. الولد في 5 ابتدائي بياخد في المدرسة دروس اتاوة عشان ينجح 150 جنيه في الشهر يعني في اليوم لازم احوشله 5 جنيه .. و البنت صغيره عندها حساسية بندفع لها 60 جنيهه في الشهر علاج يعني 2 جنيه في اليوم .. يتبقى كم .
أنا :يتبقالك 23 جنيه
عم سيد : الحمد لله عايش في اوضة على السطح مش بدفع لها ايجار لانها بتاعة اهلي .. ال 23 جنيه دول اسيب لمرراتي في اليوم 10 جنيه مصروف البيت عشان كهرباء و مياه و صيانة يتبقى كم ؟؟؟ 13 جنيه
أنا : و بعدين
عم سيد : بجيب فرخة في الاسبوع و باقي الاسبوع بناكل في اليوم بال13 جنيه ب2 جنيه عيش و جنيه جبنه و 2 جنيه حاجه حلوة للعيال في مدرستهم و لو جبنا خضار و مكرونة او رز ب 5 جنيه مثلا يتبقى 3 جنيه .. بجيب كل يومين علبة سجاير
أنا : ينهاري طب و بتعمل ايه .. و حتعمل ايه ده يدوبك .. حتعيش و تعيش ولادك ازاي و بنتك لما تدخل المدرسة
عم سيد :هههههههههه مش لكا نعيش
أنا :طب و القسط
عم سيد :ههههههههههههههههه معنديش اجابه و لا اي حد عنده اجابة
أنا : طب ليه متعملش زي سواقين النقل
عم سيد : و حخلي العربية متشتغلشي ازاي ..؟؟ حصرف منين
أنا :ده يوم واحد مش يمكن تتحل مشاكلك ... و بعدين انت شايف مين اللي ليه مصلحة في كل ده
عم سيد : ايه ده انتي ازاي متعرفيش ده حمادة عزو ننوس عين امه
أنا : هههههههههههه طب و انت معترض على الاضراب ليه
عم سيد :لاني معنيش نقابة
أنا : طب و سواقين النقل
عم سيد : خدوا حقهم
أنا : طب ححكيلك حكاية نقابتي اضطريت اشرحله حكاية نقابة المهندسين و مهندسين ضد الحراسة
عم سيد : و قررتوا تعملوا ايه
أنا : حنشارك في اضراب 6 ابريل فاكر 6 ابريل السنة اللي فاتت
عم سيد : لا مش واخد بالي
أنا : كان اضراب عام لشعب مصر الناس كان يوم احد و اغلب الناس منزلتش شغلها و ..... قاطعني عم سيد
عم سيد : آه افتكرت انا نزلت لقيت الشغل مش تمام ركب معايا واحد قالي اضراب و انه مش حد ينزل الشغل و متشتريش الحاجه الغالية ... و يا اما تنزل مظاهرة يا اما تروح بيتك قمت مروح
أنا : ايوة هو ده
عم سيد : و انتوا المهندسين عايزين متروحوش شغلكم ليه
أنا : عشان النقابة و المعاش و الخدمات و حقي اللي بدور عليه
عم سيد :يااااااااااااااااااااه ده مش احنا لواحدنا بقا اللي ضايعين
أنا : طبعا فيه حاجه اسمها مواطنه يعني الناس في مصر درجات
1- مبارك
2- أسرته
3- أحمد نظيف و لجنة السياسات
4- الوزراء و رجال الأعمال الموالين للحزب الوطني
5- أعضاء الحزب الوثني اللا ديمقراطي
6- نواب مجلس الشعب اللي مواقفهم مهزوزة
*************
************
***********
***********
كل اللي فات ده فراغ سببه فرق مستوى كبير
18- المواطن المصري العادي
19- كل من هو معارض محترم له مبدأ
20- كل من هو رافض الكيان الصهيوني و يرى أن مبارك تمادى في صهيونيته
سعم سيد :هههههههههههههههههههههههه عندك حق حزب وثني .. كل من الحكومة
أنا : بس انا مش بسميها حكومة ديه شلة الحزب الوطني
عم سيد : ايوة طبعا الديكتاتور الكبير اللي مش عارف يحكم البلد و سايبها لابنه و صايع حزبه يمشوها على مزاجهم و المصري مالوش ثمن بالنسبة لهم زي اللي بيحصل كل يوم بيعذبونا في الاقسام ومبهدلينا انا ليا جيراني في الحزب الوطني .. طلباتهم بيشتروها بالكارنية ركوبهم التاكسي بكارنية الوطني بيصيفوا مجانا في فنادق خمس نجوم عشان الحزب يسيب صاحب الفندق يبيع الخمرة و يجيبها من غير جمارك ..و انا وبقيت الجيران تعبنا منهم بس لحد ما وقفنالهم
أنا : برافووو جدا
عم سيد : ايوة خلاص بقا دول بيستعبدونا و بيهددونا بتعذيب الاقسام بس لما كلنا اتفاقنا عليهم خلاص
أنا : تمام قوي
عم سيد :طب و انا المطلوب مني ايه يوم 6 ابريل
أنا : متنزلش شغلك .. روح نقابتك قعد فيها و اعتصم و طالب بحقوقك .. انشر للناس كلها انهم ميشتغلش اليوم ده وينزلوا الشغل يعتصموا و يطالبوا بحقوقهم .. انشر دعوة للناس متنزلش تبيع و تشتر ي اليومين دول ..سواقين التاكسي اتجمعوا في مكان ما سوا و انزلوا الشارع و ارفعوا يفط البنزين والسولار سعره ينزل زي باقي دو ل العالم.. ده سعر البرميل نزل من 150 دولار ل 45 دولار
عم سيد :ياااااااااااااه بس كده
أنا : ايوة و قول لكل حد يركب معاك عن الاضراب
عم سيد : هو انتي معاكي ناس كتير
أنا: الحمد لله
عم سيد :طب هو انا مش ممكن اجيب حبة من زمايلي السواقين و نيجي نتكلم معاكم تفهموهم كده و تقنعوهم معايا عشان نشتغل سوا
أنا : تمام قوى تحب امتى
عم سيد :لا خدي رقم موبايلي و ابقي كلميني لما تحددي
أنا : خلاص يا عم سيد
عم سيد : ربنا يكرمك و ديك ابن الحلال يا بنتي و انا معاكي في اي حاجه ممكن اجيب بيها حقي
أنا : ربنا يخليك يا عم سيد بس حتعمل الللي اتفاقنا عليه
عم سيد :طبعا ده انا مصدقت حد يقولي اعمل ايه و يساعدني اني اخد حقي
أنا : لأ يا عم سيد مش انا اللي حخدلك حقك انا ححاول اسااعدك و اقولك الطريقة اللي ممكن تاخد بيها حقك و انت يا اما تعملها يا ام لأ
عم سيد: ماشي يا انسة و ادي نمرتي ..................
أنا: ماشي يا عم سيد اتفضل حسابك
عم سيد : لأ أبدا علي الطلاق ما انا واخد منك حاجه .. ده انتي كنز يا انسة
أنا : لاطبعا مينفعشو قعدنا نتخانق و في الاخر نزلت و رميتله الفلوس من الشباك و ابتسم و قعد يدعيلي و يقولي انتي قدوة لشباب جيلك
ودعوته بصراحه كفاية عليا
المهندسة/ مديحة قرقر عضو اتحاد شباب حزب العمل وعضو حركة شباب 6 ابريل

2 التعليقات:

غير معرف يقول...

برافو ياباشمهندسة مديحة

محمود رحومة يقول...

أسلوب رائع فى فن الاقناع
ووسيلة فعالة لنشر الوعى بين الأغلبية الصامتة برافو باشمهندسة مديحة

إرسال تعليق