3 القول المأمول فى رسائل المحمول

الناس دائما تفهم الحكومة غلط فى كل مرة الحكومة تكون "عاوزة" تخفف العبئ عن كاهل المواطن تطلع الست "منى" تشكك فى نية الحكومة يعنى فيها إيه لمّا الحكومة تفرض رقابة على رسائل المحمول القصيرة المعروفة بالإسم الحركى لها "S M S" وبدل ما نشكر ستنا وراس تاجنا الحكومة على إنها خايفة علينا من "البعزئة" عمال على بطال قالت لازم أتدخل وأحمى ولادى من شر أنفسهم بدل شركات المحمول الخبيثة ما تضحك على الغلابة عيالنا وتشفط فلوسهم ولأن حكومتنا غلبانة وسايبة كل واحد يعمل اللى عاوز يعمله وسايبة الناس تعبر بكل حرية دون تدخل بدليل إنها سيباهم يؤيدوا حبيب الملايين عارفينه طبعا ونسمع بعد كده إن البلد مفهاش حرية وطبعا كلكم عارفين إننا فى العصر الذى لم يقصف فيه قلم يعنى عادى جدا تتقفل جريدة الشعب ويجمد حزب العمل وتولع بنار جريدة البديل ويشردوا صحفييها،وفى ستين داهية عمرو أديب،وإبراهيم عيسى،ومعتز مطر،وعلاء صادق،ومجدى حسين يتحبس..لأن الحكومة بتاعتنا حكومة همها على الشعب والجماعة دول بصراحة زودها حبتين وبخاصة اللى اسمه حمدى قنديل يعنى الحكومة تسيبه يعمل قلم رصاص يروح  ينضم للجمعية الوطنية،طيب ما كان ينضم للحزب الوطنى أحسن،وبعدين اللى محدش فاهمه موضوع الإخوان الحكومة تقول عليهم الجماعة المحظورة علشان تحذر الناس من الاقتراب منهم ومن بلاويهم وتعمل مسلسل عشان تطفش الناس منهم ولأن الناس الغلابة واللى فهمهم على قدهم أمثالى برضو مبيسمعوش كلام الحكومة،وأنا من اليوم ورايح قررت أن أقوم بعمل حملة تأييد لحبيب الملايين بس منتظر أكبر لافتة تتعمل له أقوم أنا أعمل واحدة أطول منها نكاية فى المعارضة اللى مش عارف حاجة وسأوقع عليها بالدم لزوم التلفزيون بس أنا بصراحة محتار أعمل اليافطة لمين للكبير ولا التانى حد بس يفطنى من اللى عارفين اللعبة وطبعا اللى أنا هاعمله ده مش نفاق ولا حليطة ولا عاوز اتعين فى البترول ولا قطعة أرض حوالى 5 مليون متر مكعب أنا مع الحكومة فى كل قرارتها وأى قرار تتخذه فأكيد هى فاهمه عننا والدليل على كده إنها تريد حمايتنا من الإسراف لمواجهة أسعار القوطة وياريت ماسمعش إن المقصود بالموضوع ده موضوع رقابة رسائل المحمول هو منع رسائل الإخوان لحشد المواطنين فى الانتخابات،ولا لمنع رسائل المعارضة لجمع الهلافيت أمثالى للمظاهرات بس فيه حتة بسيطة لازم الحكومة تنصح لها وزى ما هى بتحبنا وتنصحنا احنا كمان لازم نحبها وندلها على طريق الخير فياريت الحكومة تسلط كام شيخ فضائى لعمل فتوى حلوة محندئة وتظبطها على الكتاب والسنة وتعمل حملة على القنوات الدينية تحمل عنوان: "القول المأمول فى رسائل المحمول" ولا مانع من توزيع كام بيان على خطباء الجمع يحدثوننا عن رسائل الغرام فى المحمول وخطورتها على النشئ ومن ثم يجب منع هذا الكلام الفارغ،وبعدين تلاقى رسالة وصلتك من صديق يقولك رئيس تركيا يعتذر لمواطن علشان الطريق وقف واحنا مالنا هو احنا عندنا حد بيوقف الطريق كل الطرق سالكة وعال العال حد سمع عن طريق توقف لأن فيه حدى معدى،وعندى اقتراح لحكومتى الحبيبة المخلصة يا ريت تكملى جميلك وتصادرى المحاميل من أى مواطن ينزل القاهرة لأن القاهرة هى اللى مبوظة الشباب والناس وهناك هتلاقى يا حكومة الدكتورة نجلاء القليوبى والأستاذ جميلة إسماعيل،والأستاذ محمد عبدالقدوس وضياء الصاوى وأيمن نور وعبدالحليم قنديل وحمدى قنديل وكام واحد كده من الجماعة دول وأى واحد يهوب ناحية نقابة الصحفيين جردوه من محموله فورا دول لازم تصادروا تلفوناتهم المحمولة وتنبهوا على محل يبيع هواتف محمولة أنه فى حالة قدوم أحد من هؤلاء لشراء المحمول بلغوا الجهات الأمنية فورا وعلشان نحبك أكتر وأكتر يا حكومتنا ياريت لو تتكرمى تلغى برنامج العاشرة مساء لأنه كل شوية يلسن على حكاية رسائل الـ "S M S" والأستاذة منى الشاذلى بترمى من بعيد لبعيد وهى اللى وراء حكاية أن الرقابة على رسائل المحمول فيها كلام ميطمنش وياريت يا حكومة تكرمينا شوية وتخلى أى حزب يقاطع الانتخابات يدفع كل شخص فيه عشرتلاف جنيه لتثبتى حسن نيتك وإنك عاوزة كل الأحزاب تتمتع بالحرية والديمقراطية  وبعدين الصحف والقنوات اللى عاوزة تشترك فى خدمة الرسائل المحمولة دى حلها بسيط ومن غير مشاكل يتم وضع رسالة كل يوم  لإرسالها للمشتركين مكونة من كام كلمة احنا معاك .. الله يطول فى عمرك..كله تمام  طبعا هذه الرسالة الهدف منها إشاعة الطمأنينة لدى أفراد الشعب مش كل شوية القوطة بـ 10 جنيه طيب هى مجنونة تعمل معاها إيه،أنا باكتب هذا الكلام وبأطالب بحمايتى من كل السياسيين اللى هيفهموا كلامى غلط ويقولوا إنى بعت القضية وخاصة الأشتراكى الهوى الليبرالى الهوية رامى المنشاوى .